人不可以貌相

一向以o黎，我都好相信一樣o野，人係有樣睇o既，相由心生，所以o向我同人接觸o既過程裡面，我會從第一印象好主觀咁判斷對方，包括同對方夾唔夾到？可唔可以做朋友？又或者可以同對方做到乜o野程度o既朋友？

當然我都會睇錯人，有時甚至會好錯，而事實亦證明左我睇人係存有偏差，但好奇怪，我一路都無因為咁而改變我睇人o既一套所謂標準，相反人越大主觀性越強。

最近我發現我又睇錯左一個人，o黎個人睇睇下，竟然越來越似自己，最好笑係我開初對佢o既印象係「癲婆」一名，講o野大大聲、衝動、唔理性、諗起想做就要做……，完完全全係我o既寫照，所以可以想像到我可能o向人地心目中o既第一印象都係一個咁o既人，可幸o既係我有機會多小小認識佢，可以知道佢其實唔完全係一個咁o既人，或者佢要咁樣表達係有佢o既原因！


時間有限，總唔可能每個人都好深入咁認識，唔知仲有幾多個人係o向我錯誤判斷o既情況下狠狠地埋葬左，如果有o既話，真係唔好意思，你地安息啦！

無業特工隊

每日朝早8:00-9:00，係一日裡面最充實、最充忙o既1小時，因為要爭分奪秒，為左趕及o向9:00前到達虎口。但偏偏每日o黎1個小時裡面要應付好多人，過五關斬六將，先可以順利離開住宅範圍。

首先，對面單位位阿太有兩個可愛BB，牙牙學語，每日出門，阿太都會堅持要BB們同我講BYE BYE，可惜兩個BB根本仲未識講O野，每日被阿媽迫佢地同我講O個兩個音，仲要係講唔到唔罷休，可憐O既BB根本唔係每日都有心情同我講BYE BYE，而我基於禮貌，又要局住企到佢地發到O個兩個音為止，期間自己亦要不斷揮住手掛住一個好假O既笑容起勢講BYE BYE！BYE BYE！BYE BYE！BYE BYE！......博BB可以聽到我講而發出同我相同O既兩個音！

落到樓下，我阿媽條針─保安員一見我就會下意識地望望個錶，職業病發O既我甚至會懷疑佢係O米會將我出門口O既時間落簿，到我阿媽返O黎時，就會同佢講：喂，X師奶，你個女今日好早出門口呀！又或者：喂，你個女今日好遲先出門口呀！

而守最後一道防線O既係雪糕伯，佢坐O向村口長椅，就係佢每日同我阿媽報告我究竟今日係搭的士定搭巴士返工：O華！你個女今日又搭的士喇，不過無車，佢等左成5分鐘呀......

當然，偶然更加會撞到一、兩個我阿媽O既手袋黨，由於試過O乍O帝睇佢地唔到而慘遭報串，俾阿媽教訓做人唔可以咁無禮貌唔同人打招呼，所以而家見到佢地更加要恭恭敬敬行過大禮！

基於每日遲到情況越來越嚴重，而且受唔住以上每日重複又重複、有意無意O既阻礙同監視，我O尋日終於向佢地個首領即我阿媽作出強烈投訴！！！

今朝起，對面阿太已經將大門關上、大堂保安無再O向我面前睇錶、雪糕伯直頭O向我視線範圍消失左？？？我開始懷疑我阿媽唔係一個普通人，佢可能好似TRUE LIES裡面O既阿諾舒華辛力加，表面係個平民，其實係個特工，我更有理由相信全條村都俾佢操控住，佢甚至可能已經安排左其他人O黎監視我！

喂阿媽，你好勁，不過你究竟又同人地講左O的O羊呀？

MATCH POINT

剛剛睇完o黎隻碟，好睇，但都幾難睇，因為睇完唔會舒服。

「只要行好運，不必做好人」？我當然唔會贊同，對於主角有幾心恨手辣同死好命其實亦無乜感覺，最唔舒服可能係人同人o個種無理據o既passion同埋無warranty o既承諾？喂講者隨心，聽者受o西，關邊個事？你永遠唔知另一個人o既真正諗法，就算o黎一刻我係咁諗，下一刻改變左，who know？自以為好認識o既人o既事可以完全唔係o個回事，幾恐怖！

好多人講唔怕俾人呃，不過最緊要呃一世，係咩？有o野可以呃一世o架咩？

分離從來不易

今日我先體會到咩叫難捨難離，坐底左唔想起身，起左身唔想走，走左唔想上車，車開左唔想到達，到左唔想分離。兩個主角同兩個臨時演員，主角交足戲，臨時演員完全唔入戲。人走左，臨時演員入番鏡，主角繼續用眼神同面部表情交戲，臨時演員無台詞唔適做戲，氣氛死寂......我地真係唔係一對好o既臨時演員！

其實分離有幾苦，試過就知，但最好o米試，就算試過o既其實都未必領會到人地o既感覺，不過我有小小變態地鐘意短暫o既分離，因為祈待/等待重聚o既過程好正，睹物思人、神不手舍、腦海裡面不斷重播幻想與回憶之間o既片段，陷入胡思亂想o既空間，最難頂係o個o的無來電顯示o既 miss call，絕對可以令人徹夜難眠！

但係如果分離係連埋forever的話，咁sorry，以上情況不適用，絕對會死人o架！

改變歷史？

早幾日睇左套戲，係個人用個remote skip左自己o既人生，睇完我自己諗，俾我都唔會咁做，點知skip左o的衰o野o既同時，會唔會一併skip埋o的o羊好o野，而且只係skip左，唔係delete左，件事始終係發生左！

重點係，我無興趣預知將來，知o西咁悶仲洗做人？但我成日都會諗，如果我可以返到過去，我會唔會選擇改變歷史？諗左一輪，答案竟然係會，有3件事唔可以話係後悔，但如果有得再選擇，我唔會咁揀。

第一會改變17歲時o既一個選擇。
第二會做一份我真係有興趣o既工，絕對唔會入o黎行。
第三會開口同佢講我o既感受，會同佢講，係，我係好唔想你去......

美麗o既回憶想留住，苦澀o既想洗去，自然不過。有人話是苦是美，都係自己o既人生，都係自己o既一部份，應該接納自己o既所有。但對我o黎講，無法改變o既，只可以局住學會同佢共存。

FATHER, are you here?

每逢o黎o的時間，我會問：上帝，你去左邊？

一個唔講理由、玩針對、自以為事、癲狂、是說非非說是、有佢講無人講、極有私心o既人，己經係一個好可憎o既人，如果你要一齊面對10個咁o既人，你會點？

我尋日，同上述一班狂人，惡鬥左接近6小時，到凌晨兩點，為公司戰死沙場，壯烈犧牲。公司今日應該o向我臺面上面刻上「為國捐軀」以昭亡魂！

入行咁多年o黎，見盡唔少奇人奇事o既我，開過好多好難頂o既會，對過好多難頂o既人，從未試過好似尋晚咁，四個字“心力交瘁”。我諗唔知情o既人如果在場，一定會以為我殺死左佢地10個人o既全家，而家俾佢地捉到兼且即時審訊。

同我一齊開會o既同事，本身個人都好tough兼且口若懸河，到會議後期已經放棄發言，只係掛住一副黑臉坐o向我隔離繼續精神上支持我。會議後我仲可以用o個把已經沙沙地o既聲線爆o西粗鬧o個班人，但係當自己一個人上到的士後，個世界好似停左，黑o西，我再問：上帝，頭先開會，你o向唔o向度？你去左邊？

Who shall separate us from the love of Christ? shall tribulation, or distress, or persecution, or famine, or nakedness, or peril, or sword?

無價

140萬1 LOVE U車牌，我無，但係我有O黎個！

Relax, God Is In Control

突破

如果free一日俾你，你會做咩？可能都係同平時一樣o既o野！今日我就free足一日，焦早時計劃左想今日做好多o野，結果今日所做o既o野同尋日同前日同大前日一樣！

問10個人想唔想突破自己？應該都會有5個話想；如果真係俾o黎5個人一個突破o既機會，可能只會有2-3個人會嘗試；o向肯嘗試o既人裡面又有幾多個會堅持到底？

有時會成日帶住個秤做人，每件事都會秤一秤，值唔值？抵唔抵？化唔化算？其實唔係唔好，因為有時都要衡量下自己有無咁o既能力，有o的o野唔可以太過唔計後果。但有時如果太過計算，又會無左突破同改變o既勇氣！

要做番而家o既自己好容易，但10年後o既我如果仲係同而家o既我一樣，我又唔甘心？為自己o既理想行前一少步，由聽日起戒的士、寫番o野！

小姪女

雖然唔明點O黎個年代點解仲有人有信心生兒育女，但身邊O既老友、同事、家人......甚至連舊情人都接連傳出喜訊，證明O向好多人心目中對將來仍然抱有希望！

我除左對O黎個世代感到無信心外，最重要係唔想承擔責任，想自由自在、無拘無束。有人問過我，而家可能會響往自由自在，但老左無人陪會好悶？

我細心一諗，如果有仔女O既主要FUNCTION係陪我，咁真係多謝O西，我老左如果經濟許可想週圍去，如果有仔女亦希望佢四圍去見多識廣，陪我？唔該O西先！

不過，我又多一個姪女始終係件開心事，喂喂喂，小姪女，如果姑姐老左悶悶地，不如你抽個空陪陪我！

TAKESHI KANESHIRO

o黎個世界有咩係百看不厭？我諗係佢......

所謂魅力其實係一樣好無準則而且因人而異兼且豪無理性可言o既感覺。

13年前，當知道我死黨無程程鐘意佢時，我除左一味譏笑以外，就係豪不留情o既批評。點知6年前一個無o野做o既夜晚，睇一套無邏輯o既日劇時，竟然會開始左我泥足深陷o既旅程......

首先，我用左最短o既時間同最多o既錢去追番我唔認識佢o個10年，跟住o向o黎6年裡面，佢每年寥寥無幾o既暴光卻成為我平日最關注o既事物！一幅極粗糙o既快拍相片、一段最無聊o既老作新聞，都可以令我興奮半天。因為佢我轉用ERICSSON手機、因為佢我靜雞雞飲POCARI、UCC、VOLVIC、因為佢去日本一定要搭JAL、因為佢我走去買BIOTHERM HOMME送俾人......

記憶中3次遠距離同1次近距離見到佢時，我都只係好似俾人點左穴咁，只可以用目瞪口呆O黎形容自己！係身邊O既人同事太過平平無奇？非也，係佢實在太......型！

!!!

我知點解我o向公司咁唔受歡迎？因為我好麻煩，點解我咁麻煩？因為我唔想求求其其;點解唔可以求求其其？因為我對自己有要求 ;點解要有要求？因為我唔想人做我做，同人做同一樣o野 ;點解要做同人唔同o既o野？因為份工本身已經好悶，如果再搬字過紙，會死得仲快;點解份工咁悶？STOP! why keep asking? I'm fed up with this!

花瓶

O華，竟然俾我見到o黎張圖！花瓶其實都有用途，係一種擺設，一盆花靚唔靚，其實花瓶都佔一席，所以花瓶有咁多唔同o既種類、形態，係為左係襯托出花o既美麗，盆花靚，大部份人只會集中注意力o向o的花o既配搭上，花瓶永遠居次或被遺忘，其實我反而覺得花瓶係屬於默默耕耘o既一種！下次唔好再用花瓶形容o個o的o向辦公室騷手弄姿、正經事唔做o既女職員，因為咁樣絕對貶低左一個花瓶。

LAKE HOUSE

電影吸引o既地方可能就係非真實、非理性，片長有限但想像無限，o向現實搵唔到，遇唔到。可惜兩個世界只有兩分鐘路程兼且一門之隔，返到街上，望望個天，望望條街，望望o的人，that's real-life!

所以下雨天路旁唔會長出大樹為我擋雨、檢查屋企地板時唔會發現地板底下有任何o野、走o向街上唔會發現誰人為我留下的字句......

串燒三姊妹？

串燒三姊妹？哈哈，天下間無奇不有，但所有千奇百怪O既事都竟然可以發生o向我地o黎間芝麻咁大O既公司，直頭可以比美太平山頂O既"believe it or not"?

傳言O既O野，有人講就有人聽，有人聽就有人信，有人信自然有人繼續講，生生不息！代代相承！有市有價！烈女，請接招。哈哈哈！


一把火如果只係暫時被一條繩綑綁住，佢都仲係一把火，如果熄左仲著唔著得番呢？

Tiramisu

中傭之道

職場上有一類人，待人處事但求別起衝突，以大事化小，小事化無為原則，游走於人海中不一定面面俱圓，但總以多一個朋友勝於多一個敵人為依歸，不走最前，不主動發言，永遠保持中傭之道。

反之，另一類人，對人對事自有一套判斷，事事要求有理說清，不平則鳴，話要說得清楚，做要做得徹底，不作妥協，誓不讓步，快人快語但求無愧於心。

從小至大，以後者自居，即使經常弄至損手爛腳，箭在背上，吃力不討好，亦會孤掌自鳴。然而今日經歷一事，啟發原來一廂情願橫衝直撞可能會傷及他人，自以為據理力爭、但有時根本無需探究真理。各人自有各人的要求，何苦硬將自我價值強加於人？有人追求平穩，有人熱衷爭辯，中傭之道又有何不可？